السفير جعفر سومي يكتب: حميدتي.. “نفسي” أصدقك

0 إلى قائد مليشيا الدعم السريع حميدتي أريد أن أصدقك.. شاهدت مثل غيري مقطع فيديو مبذول في الفضاء الإفتراضي وانت تتحدث لمجموعة من جنودك في المليشيا الارهابية وهم جلوس لا حراك لهم سوى حركة رموش العيون.. رأيتك تتحدث منكسراً ومحبطاً بلغة لا تشبه القادة والزعماء وقد اوغلت في السباب واستخدام الكلمات الوضيعة.. ما يهمني في خطابك هو – وبما أنني تجاوزت العقد الخامس من العمر – وقد عركتني الحياة وعركتها – ومررت بكثير من التجارب وتعاملت مع مختلف الأجناس والشخصيات مما يجعلني أميز بكل سهولة بين الصادق والكاذب والاصيل والوضيع، والحر و (الفلنقاى) .
0 في الأيام الأولى لبداية هذه الحرب اللعينة التي أشعلت نيرانها سمعتك يا حميدتي.. وانت تتحدث لإحدى القنوات الفضائية من داخل الخرطوم العاصمة وانت في كامل جبروتك وعنفوانك.. وعدتك وعتادك، وبكل غطرسة تؤكد للقناة الفضائية أنه (ما عندك تواصل مع البرهان خالص) هكذا قلتها دون ذكر للمنصب. ثم أردفت أن (نحن ما عندنا أي اتصال مع البرهان.. البرهان يستسلم بس. ما استسلم نحن حنستلمو. أصلا ما عندنا كلام معاو اكتر من كده).
0 وللغرابة والتناقض شاهدتك في الفيديو الأخير وانت تحدث جماعتك بعد سلسلة من الكلمات البذيئة.. (ياخ أنا بضرب ليك الذخيرة مدورة أنا بضرب ليك ياخ أوقف الحرب، أوقف المعركة. أثناء المعركة شغالة أنا بقول ليك أوقف الحرب يا زول. أسحب القوة. تقفل تلفونك وتزوغ).. يا حميدتي أنا صدقتك واقتنعت بكلامك الرئيس البرهان اغلق الهاتف في (وشك) ودخل البيدروم وانت محاصر القيادة “عشان تستلمو”.. طيب طلع كيف ومشى بورتسودان؟ دي يصدقوها كيف؟.
0 وبعدها انت اعترفت وقلت طردونا من الخرطوم.. حاليا السيد الرئيس البرهان موجود في الخرطوم، ورئيس دولة الوزراء د. كامل ادريس موجود في الخرطوم.. والمواطنين رجعوا الخرطوم، وأنا ذاتي موجود في الخرطوم.. طيب كيف يكون الخرطوم مافيها ناس؟.. لو تصدقني (الخواجات الأنا بعرفهم بس) اكتر من مائة منهم موجودين في الخرطوم.
0 يا حميدتي نحن ناس كبار في العمر وانت عايز تحكمنا فأحسن تقول كلام معقول عشان نصدقك.. ولا انت فاكر نحن (الفلنقايات) ديل راسنا فاضي وبنصدق أي كلام؟.. حاليا أنا قاعد افكر كتير وما لقيت اجابة.. من يوم ظهرت في فيديو في القصر الجمهوري، البوابة الشمالية الشرقية.. وانت راكب عربية قتالية وقلت لزولك ما تصور، لو بتتذكر اليوم ده. ومن ديك تاني ما شفناك. انت مشيت وين؟.
0 والله حميدتي نفسي اصدقك !

* رئاسة وزارة الخارجية